1.雷公
雷公扣扣霆,鴨仔跋落田,
田底生柳枝,柳枝生土瓶,
土瓶生草橄欖,橄欖雙頭紅,
紅的挽來食,青的送丈人,
丈人呵咾好,阿哥娶阿嫂,
阿嫂跤疼袂出房,阿哥手疼袂挨礱
2.做頭前
做頭前,食鴨pîng;做中央,食糖霜;
做尾後,食塗豆。做頭前,予虎咬一pîng,
做中央,予狗咬尻川,做後壁,予鬼掠。
3.風緊來
風風風,風緊來,一錢予你買王梨,
風風風,風緊去,一錢予你買魚翅。
4.食菜脯配鹹菜乾
月光光,早早擔水落柑園,
柑仔種四欉,四姊妹仔真成人,
大的嫁福州,第二的嫁金樹,
第三的嫁海岸,第四的嫁內山,
大的轉來金馬鞍,二的轉來金桶盤,
三的轉來金交椅,四的轉來氣半死,
平平是姊妹,共我嫁上山,
三頓糜,煮甲爛爛爛,食菜脯配鹹菜乾。
5 阿三哥
一、二、三,阿三哥去內山,
四、五、六,阿三哥去斗六,
七、八、九,阿三哥去海口,
十、十一、十二,阿三哥去嘉義。
6 一隻鳥仔哮啾啾
嘿嘿嘿都一隻鳥仔哮啾啾嘿嘿吼,
哮甲三更到半暝,揣無岫吼嘿吼。
嘿嘿嘿都啥物人仔共阮挵破這个岫都咧,
予阮掠著毋放伊干休吼嘿吼。
7 元宵暝
正月十五元宵暝,攑一支鼓仔燈去踅街,
東門行行,西門踅踅,鼓仔燈愈來紲愈濟,
親像滿天的金星咧使目尾。
8 火金星十五暝
火金星,十五暝,魚挵鼓,先生娘大腹肚,
正月生查埔,二月生查某,坐我船,拍我鼓,
食我白米飯,配我鹹菜脯。
9 新娘仔
吃菝仔,放銃子,吃柚仔,放蝦米,
吃龍眼,放木耳,欲娶新娘上歡喜。
新娘仔透早起,入灶跤洗碗箸,
入大廳拭交椅,入房間繡針黹,
呵咾兄呵咾弟,呵咾親家親姆gâu教示(教好伊)。
10 火金蛄
火金蛄來食茶,茶燒燒配弓蕉,
茶冷冷配龍眼,龍眼會開花,
匏仔換菜瓜,菜瓜好煮湯,
匏仔換粗糠,粗糠好起火,
九嬸婆仔gâu炊粿,炊到臭火焦又閣兼著火。